फिल्म‘आई एम ट्वान्टी वान’ नाममा ‘ज्याकी’ थपियो

फिल्म

Home
फिल्म
फिल्म‘आई एम ट्वान्टी वान’ नाममा ‘ज्याकी’ थपियो

फिल्म‘आई एम ट्वान्टी वान’ नाममा ‘ज्याकी’ थपियो

बिहिवार, माघ १२, २०७९ रंगसंसार

‘इन्टु मिन्टु लण्डनमा’ फेम्ड निर्देशक रेनशा वान्तवा राई (राणा)ले करिब चार वर्षअघि दोस्रो फिल्म ‘आई एम ट्वान्टी वान’को घोषणा गरेकी थिइन् । निर्माण घोषणाको तीन वर्षपछि कोरोना महामारीताका छायांकन भएको फिल्मको अब नामको अगाडि ‘ज्याकी’ थपिएको छ । बिहीबार वसन्त पञ्चमीको अवसर पारेर निर्माण टिमले एक भिडियोमार्फत् फिल्मको नयाँ नाम ‘रिभिल’ गरेको हो ।

यस फिल्ममा धिरज मगर र जसिता गुरुङको मुख्य भूमिका रहेको छ । धिरज ‘ज्याकी’ पात्रको भूमिकामा रहेकाले फिल्मको नाम चरित्र केन्द्रित राखिएको हो । नयाँ नाम सार्वजनिक गर्न तयार पारिएको भिडियोमा फर्स्टलुक पोस्टर चाँडै सार्वजनिक हुने उल्लेख छ । फिल्मको प्रदर्शन मिति भने घोषणा गरिएको छैन । तर, आगामी बैशाख २१ गते फिल्म प्रदर्शन गर्ने तयारीमा निर्माण टिम छ ।

‘ज्याकी आई एम ट्वान्टी वान’लाई नेपालको पहिलो डान्स फिल्म भनिएको छ । रेनशा कोरियोग्राफर पनि रहेकाले उनले नृत्यमाथि आधारित भएर फिल्म बनाएकी हुन् । अरुण क्षेत्रीको पनि मुख्य भूमिका रहेको फिल्मलाई प्रज्वल राणा र प्रभु शमशेर जबराले निर्माण गरेका हुन् । ‘इन्टु मिन्टु लण्डनमा’, ‘मेरो एउटा साथी छ’ निर्माण कम्पनी आइकोर फिल्मस्ले फिल्मको निर्माण गरेको हो ।

यो फिल्ममा कालिप्रसाद बाँस्कोटा र रोहित शाक्यको संगीत छ भने सुशन प्रजापतिको छायांकन छ । काठमाडौं, धरान, ललितपुर लगायतका स्थानमा छायांकन भएको यो फिल्मका लागि धिरज र जसिताले एक वर्षभन्दा लामो समय नृत्यको तालिम लिएका थिए । नेपालमा नृत्यको कथामा फिल्म बनाउन गाह्रो रहेको र आफूले निकै चुनौतीपूर्ण काम सकाएको निर्देशक राईले बताएकी छन् ।