यसवर्षको विश्वप्रसिद्ध कान्स फिल्म फेस्टिभलअन्तर्गतको कान्स मार्केटमा एक नेपालीसहित ५ फिल्मले ‘हफ गोज टु कान्स’ अवार्ड जितेका छन् । त्रिवेणी राई निर्देशित ‘सेप अफ मोमो’ यो कार्यक्रमको लागि छनोट भएको छ । यो फिल्ममा गौमाया गुरुङको शीर्ष भूमिका छ । पशुपति राई, राहुल मुखिया र श्यामाश्री शेर्पाको पनि अभिनय छ ।
कान्स मार्केटले आधिकारिक वेबसाइटमार्फत यसबारे जानकारी दिएको छ । ‘सेप अफ मोमो’सहित चीनको ‘हर फस्ट टेस्ट’, इन्डोनेसियाको ‘अन योर ल्याप’, चीनको ‘से माइ नेम’, जापानको ‘ह्वाइट फ्लावर्स एन्ड फ्रुट्स’ कार्यक्रममा छनोट भएका छन् ।
यी सबै फिल्म कान्स मार्केटमा पिचिङ गरिएका थिए । परिवारका पुरुष सदस्यको मृत्युले पीडित मुख्य पात्र परिवारमा फर्कन जागिर छोड्छिन् । उदासिन बाँकी महिलाहरूलाई देखेर उनले उनीहरूलाई स्वतन्त्रता र आत्मनिर्भरतातर्फ सशक्त बनाउने संकल्प गर्छिन् । यसको कथा यही थिममा घुमेको छ ।
निर्देशक राईसँगै, निर्माता किसले र मुख्य कलाकार गौमाया गुरुङले महोत्सवमा फिल्मको प्रतिनिधित्व गरेका थिए, जहाँ टोलीले भारत प्याभिलियनमा यसको आधिकारिक पोस्टर पनि सार्वजनिक गरेको थियो । यो कार्यक्रममा छनोट भएसँगै फिल्मले पोस्ट प्रोडक्सन, ल्याब सहायता, फिल्म निर्माणमा हङकङ एसिया फिल्म फिनान्सिङ फोरमबाट सहयोग पाउनेछ ।
हङकङ-एसिया फिल्म फाइनान्सिङ फोरम (एचएफ) सँगको साझेदारीमा तयार पारिएको “गोज टु कान्स“ पहलले अधूरा परियोजनाहरूलाई एक्सपोजर, नेटवर्किङ अवसरहरू र सम्भावित वितरण सम्झौताहरू प्राप्त गर्न प्लेटफर्म प्रदान गरेर एसियाली सिनेमामा उदीयमान आवाजहरूलाई बृद्धि गर्ने लक्ष्य राखेको छ।
छनोट भएका पाँच टोलीमध्ये प्रत्येकले कान्स फिल्म बजारमा अन्तर्राष्ट्रिय प्रतिनिधिहरूलाई आफ्नो कामको १० मिनेटको अंश प्रस्तुत गरे । उक्त सेटिङले विश्वव्यापी वितरक र सेल्स एजेन्टसँग महत्वपूर्ण भेटघाट प्रदान गर्यो, जुन अवसरलाई निर्देशक राईले रोमाञ्चक र चुनौतीपूर्ण रूपमा वर्णन गरिन् ।
