‘हाम्रो आवाज - नयाँ नेपाल’ दर्शकमाझ

म्यूजिक

गृहपृष्ठ
म्यूजिक
‘हाम्रो आवाज - नयाँ नेपाल’ दर्शकमाझ

‘हाम्रो आवाज - नयाँ नेपाल’ दर्शकमाझ

मंगलबार, वैशाख ८, २०८३ रंगसंसार

पोखरास्थित सांगीतिक समूह ‘बफिन्स ९८’ले जेन–जी पुस्ताको विद्रोह र आन्दोलनलाई समेट्दै ‘हाम्रो आवाज (नयाँ नेपाल)’ शीर्षकको नयाँ गीत सार्वजनिक गरेको छ । यस गीतले २०८२ भदौ २३ मा युवाहरूले देशव्यापी रूपमा उठाएको परिवर्तनको आवाजलाई चित्रण गर्ने प्रयास गरेको छ ।

गीतमा भ्रष्टाचार, अभिव्यक्ति स्वतन्त्रतामाथिको नियन्त्रण र सामाजिक सञ्जाल प्रतिबन्धजस्ता विषयविरुद्ध युवाहरूको असन्तुष्टि र सडक संघर्षलाई मुख्य रूपमा प्रस्तुत गरिएको छ । आन्दोलनका क्रममा भएको दमन, गोलीकाण्ड र त्यसबाट भएको जनधनको क्षतिलाई पनि गीतमा भावनात्मक रूपमा समेटिएको छ ।

यस गीतका शब्द तथा स्वर सञ्जीव गुरुङ का हुन्, जसले लामो समयदेखि देशभक्ति र सामाजिक चेतनाका गीतहरू प्रस्तुत गर्दै आएका छन् । संगीत संयोजन उनले सुमन तामाङसँग मिलेर गरेका हुन् भने रेकर्डिङ तथा मिक्सिङ पनि सुमनकै रहेको छ ।

गीतको म्युजिक भिडियोमा देशभरका युवाहरूको आन्दोलन, श्रमजीवी जीवनशैली र विभिन्न भूगोलका दृश्यहरू समावेश गरिएको छ । भिडियो निर्देशन तथा सम्पादन जीवन भाइ ले गरेका हुन् ।

ब्यान्डका अनुसार ‘हाम्रो आवाज (नयाँ नेपाल)’ केवल गीत मात्र नभई आन्दोलनका सहिद र घाइतेप्रति श्रद्धाञ्जली तथा परिवर्तन चाहने सम्पूर्ण युवाहरूका लागि समर्पित सन्देश हो ।

प्रकाशित मिति: मंगलबार, वैशाख ८, २०८३ १२:४६

प्रतिक्रिया दिनुहोस्