‘चिरञ्जीवी भवः’ मा आशीर्वाद

फिल्म

गृहपृष्ठ
फिल्म
‘चिरञ्जीवी भवः’ मा आशीर्वाद

‘चिरञ्जीवी भवः’ मा आशीर्वाद

बिहीबार, वैशाख १०, २०८३ रंगसंसार

हास्य क्षेत्रमा लोकप्रिय जोडी कुमार कट्टेल ‘जिग्री ब्रो’ र दीपकप्रसाद आचार्य ‘काकु’को नयाँ चलचित्र ‘चिरञ्जीवी भवः’ ले कास्ट विस्तारलाई तीव्र बनाएको छ । यसै क्रममा अभिनेता आशीर्वाद क्षेत्री मुख्य भूमिकाका लागि अनुबन्धित भएका छन् ।

निर्माण टिमले बुधबार औपचारिक जानकारी दिँदै आशीर्वादलाई फिल्मको प्रमुख पात्रका रूपमा भित्र्याइएको जनाएको हो। यसअघि नै मोडल तथा इन्फ्लुएन्सर प्रशंसा रायमाझीले यही चलचित्रबाट नेपाली फिल्म क्षेत्रमा डेब्यु गर्ने घोषणा भइसकेको छ । निर्माण पक्षले पोस्टरमार्फत उनलाई स्वागत गरिसकेको छ । फिल्ममा आशीर्वाद र प्रशंसाको जोडी बन्ने हो वा होइन भन्ने विषयमा भने टिमले अझै स्पष्ट पारेको छैन ।

नयाँ वर्ष २०८३ को अवसर पारेर सार्वजनिक गरिएको यस चलचित्रलाई दीपकप्रसाद आचार्यले निर्देशन गर्नेछन् भने कथा कुमार कट्टेलले तयार पारेका हुन् । लेखनमा सविन अधिकारी र बसन्त न्यौपानेको सहभागिता रहेको छ ।

सामाजिक ड्रामा विधामा निर्माण हुने ‘चिरञ्जीवी भवः’ ले दुई पुस्ताबीचको सोच, सम्बन्ध र द्वन्द्वलाई मुख्य कथावस्तु बनाउनेछ । लेखक कट्टेलका अनुसार कथा समकालीन परिवेशमा आधारित रहनेछ । उमेश कुमार बराल निर्माता रहेको यस चलचित्रमा कार्यकारी निर्माताका रूपमा कुमार कट्टेल र शैलेश खत्री रहेका छन् ।

यो फिल्म दीपकप्रसाद आचार्यको दोस्रो निर्देशकीय प्रयास हुनेछ । यसअघि उनले निर्देशन गरेको ‘परान’ उल्लेखनीय व्यावसायिक सफलता हासिल गरेको थियो । साथै कुमार कट्टेलको ‘लाज शरणम्’ले पनि राम्रो व्यापार गरेको थियो ।

आशीर्वाद क्षेत्रीको प्रवेशसँगै ‘चिरञ्जीवी भवः’ को कास्टिङ थप सशक्त बनेको छ । निर्माण पक्षका अनुसार अब बाँकी कलाकार तथा प्राविधिक टोली छनोटको काम अगाडि बढिरहेको छ ।

प्रकाशित मिति: बिहीबार, वैशाख १०, २०८३ ११:५४

प्रतिक्रिया दिनुहोस्