एकदेवको ‘चमेली’ दर्शकमाझ

म्यूजिक

गृहपृष्ठ
म्यूजिक
एकदेवको ‘चमेली’ दर्शकमाझ

एकदेवको ‘चमेली’ दर्शकमाझ

बिहीबार, वैशाख ३१, २०८३ रंगसंसार

नेपाली सांगीतिक बजारमा लोकप्रिय गायक एकदेव लिम्बु को नयाँ गीत ‘चमेली’ दर्शकमाझ आएको छ । यतिबेला यो गीत चर्चाको केन्द्रमा रहेको छ । गीतको शब्द, संगीत तथा म्युजिक भिडियो दर्शकमाझ निकै रुचाइएको छ ।

गीत चर्चामा आउनुको अर्को मुख्य कारण भने भिडियोमा अभिनेत्री निरूता सिंहको विशेष सरप्राइज इन्ट्रि हो । निरूताको अप्रत्याशित उपस्थितिले दर्शकलाई थप उत्साहित बनाएको प्रतिक्रिया आइरहेको छ ।

निरूतासँग सहकार्य गर्न पाएको अनुभवबारे एकदेवले आफू निकै प्रभावित भएको बताएका छन् । उनका अनुसार निरूताबाट उनले विनम्रता र पेशागत समर्पण सिक्ने अवसर पाए। “हम्बलनेस भन्ने कुरा मैले उहाँबाट सिकें। यत्तिकै यति धेरै फिल्म दिनुभएको रहेनछ, यत्तिकै आफ्नो समयको नम्बर वान नायिका बन्नुभएको रहेनछ,” उनले बताएका छन् ।

एकदेवले निरूतासँगको सहकार्यलाई ‘माइन्ड ब्लोइङ’ अनुभवको रूपमा वर्णन गरेका छन् । दर्शकबाट निरूताको उपस्थितिलाई लिएर सकारात्मक प्रतिक्रिया प्राप्त भइरहेको भन्दै उनले खुसी व्यक्त गरे ।

अन्जन लिम्बुको निर्देशनमा तयार भएको गीतको भिडियोमा निरूता सिंह, आकृति नेगी, दिकिला शेर्पा र एकदेवको अभिनय रहेको छ । एकदेवले आफू अहिले पनि दर्पण छायाँ फिल्मको ठूलो प्रशंसक रहेको बताए । उनका ‘आँखामा आउने सपनी’, ‘शिरफूल’ र ‘झिमझिमाउने आँखा’ लगायत दर्जनौं गीत लोकप्रिय छन् ।

प्रकाशित मिति: बिहीबार, वैशाख ३१, २०८३ १३:३०

प्रतिक्रिया दिनुहोस्