काठमाडौंमा चिनियाँ फिल्म महोत्सव सुरु

फिल्म

गृहपृष्ठ
फिल्म
काठमाडौंमा चिनियाँ फिल्म महोत्सव सुरु

काठमाडौंमा चिनियाँ फिल्म महोत्सव सुरु

बुधबार, जेठ २०, २०८३ रंगसंसार

बेइजिङ अन्तर्राष्ट्रिय चलचित्र महोत्सवमा सम्मानित ६ चिनियाँ चलचित्रहरूको विशेष प्रदर्शन कार्यक्रम ‘टियानतान अवार्ड प्यानोरामा’ अन्तर्गत काठमाडौंमा मंगलबारदेखि सुरु भएको छ । कार्यक्रमको उद्घाटन सागर झान निर्देशित चलचित्र ‘ट्रयाप्ड’ को प्रदर्शनबाट गरिएको हो ।

चीन चलचित्र प्रशासन, बेइजिङ अन्तर्राष्ट्रिय चलचित्र महोत्सव र नेपाल चलचित्र तथा सांस्कृतिक प्रतिष्ठानको सहकार्यमा आयोजित कार्यक्रम ठमेलस्थित छाया सेन्टरमा सञ्चालन भइरहेको छ । उद्घाटन समारोहमा नेपालका लागि चिनियाँ दूतावासका मिनिस्टर काउन्सिलर चउ पान, ब्राजिलका कार्यवाहक राजदूत सर्जियो काउटो, वरिष्ठ निर्देशक तुलसी घिमिरे तथा नेपाली चलचित्र क्षेत्रका विभिन्न संघ–संस्थाका प्रतिनिधि र कलाकारहरूको उपस्थिति रहेको थियो ।

कार्यक्रममा बोल्दै प्रतिष्ठानका अध्यक्षले यस्ता सांस्कृतिक आदानप्रदानका कार्यक्रमले नेपाल–चीन सम्बन्धलाई अझ सुदृढ बनाउने र नेपाली चलचित्रलाई चिनियाँ बजारसम्म पुर्‍याउन सहयोग पुग्ने विश्वास व्यक्त गरे । मिनिस्टर काउन्सिलर पानले चलचित्रलाई मनोरञ्जनको माध्यम मात्र नभई समाज र संस्कृतिलाई बुझ्ने प्रभावकारी साधनका रूपमा व्याख्या गर्दै दुई देशबीचको सम्बन्ध विस्तारमा यसको महत्वपूर्ण भूमिका रहने बताए ।

उद्घाटन प्रदर्शनपछि निर्देशक सागर झानसँग दर्शक तथा सञ्चारकर्मीबीच अन्तरक्रिया पनि भएको थियो । उनले ‘ट्रयाप्ड’ आफ्नो किशोरावस्थाका अनुभव र स्मृतिबाट प्रेरित भए पनि कथावस्तु पूर्ण रूपमा काल्पनिक रहेको स्पष्ट पारे । नेपाली दर्शकका लागि क्राइम थ्रिलर विधा नयाँ नभएको उल्लेख गर्दै उनले नेपाली चलचित्र र दर्शकको रुचिबारे आफू जानकार रहेको बताए ।

महोत्सवको पहिलो दिन ‘बियोन्ड द स्काइज’ र ‘समर डायरी’ पनि प्रदर्शन गरिएको थियो । काठमाडौंस्थित चिनियाँ सांस्कृतिक केन्द्र तथा विभिन्न कन्फुसियस इन्स्टिच्युटहरूको सहयोग रहेको यो कार्यक्रम बिहीबारसम्म छाया सेन्टरमा जारी रहने आयोजकले जनाएको छ ।

प्रकाशित मिति: बुधबार, जेठ २०, २०८३ १०:२०

प्रतिक्रिया दिनुहोस्