‘नेपालकी छोरी’ दर्शकमाझ

म्यूजिक

गृहपृष्ठ
म्यूजिक
‘नेपालकी छोरी’ दर्शकमाझ

‘नेपालकी छोरी’ दर्शकमाझ

आइतबार, जेठ २४, २०८३ रंगसंसार

नेपाली सांगीतिक बजारमा गायिका तेजवती जोशीको स्वरमा सजिएको नयाँ गीत ‘नेपालकी छोरी’ सार्वजनिक भएको छ । देशप्रेम, स्वाभिमान र नेपाली संस्कृतिको भावलाई समेटेर तयार गरिएको उक्त गीतको भिडियो हालै दर्शकमाझ ल्याइएको हो ।

कुमार मिश्रको शब्द तथा टेकेन्द्र नेपालीको संगीत रहेको गीतले नेपाली नारीको आत्मसम्मान, ठूलाप्रतिको आदर र सानाप्रतिको स्नेहलाई कलात्मक ढंगले प्रस्तुत गरेको छ । गीतमार्फत स्वाभिमानी, साहसी र आफ्नो पहिचानप्रति गर्व गर्ने नेपाली छोरीको चरित्रलाई उजागर गर्ने प्रयास गरिएको निर्माण पक्षले जनाएको छ ।

गीतको भिडियोमा मोडल गीता ढुंगानाले अभिनय गरेकी छन् । नेपाली मौलिक परिवेश र संस्कृतिलाई केन्द्रमा राखेर निर्माण गरिएको भिडियोमा उनको प्रस्तुतिले गीतको भावलाई अझ प्रभावकारी बनाएको छ ।

योगेन्द्र राजकर्णीकारको निर्माण रहेको यस गीतमा रिदम कँडेलको एरेन्ज, साजन शाहको मिक्सिङ तथा मास्टरिङ रहेको छ। भिडियोको निर्देशन जीबी आग्रीले गरेका हुन् भने कोरियोग्राफी थम्मन टाडीको रहेको छ । उत्सव दाहालको छायांकन तथा सिलन लम्सालको सम्पादन रहेको भिडियो ओएसआर डिजिटलमार्फत सार्वजनिक गरिएको हो ।

गायिका तेजवती जोशी र संगीतकार टेकेन्द्र नेपालीले यसअघि ‘चुम्बक’ र ‘हजार जुनी’ जस्ता गीतमा समेत सहकार्य गरिसकेका छन् । जोशीले नेपाली भाषासँगै नेवारी भाषामा पनि विभिन्न गीत सार्वजनिक गर्दै आफ्नो सांगीतिक यात्रालाई निरन्तरता दिँदै आएकी छन् ।

प्रकाशित मिति: आइतबार, जेठ २४, २०८३ १६:३३

प्रतिक्रिया दिनुहोस्