भक्तराज आचार्यको स्मृतिमा स्रष्टाहरुलाई सम्मान

म्यूजिक

गृहपृष्ठ
म्यूजिक
भक्तराज आचार्यको स्मृतिमा स्रष्टाहरुलाई सम्मान

भक्तराज आचार्यको स्मृतिमा स्रष्टाहरुलाई सम्मान

सोमबार, जेठ २५, २०८३ रंगसंसार

स्वर्गीय भजन सम्राट भक्तराज आचार्यको स्मृतिमा स्थापना गरिएको भक्तराज आचार्य संगीत प्रतिष्ठानले संगीत तथा अभिनय क्षेत्रमा योगदान पुर्‍याएका चार जना स्रष्टालाई सम्मान गरेको छ ।

सिटी एक्सप्रेसको सहकार्यमा आइतबार काठमाडौंमा आयोजित विशेष कार्यक्रममा ‘भक्तराज आचार्य राष्ट्रिय संगीत सम्मान–२०८२’ वरिष्ठ गायिका मीरा राणा तथा संगीतकार सीके रसाइलीलाई प्रदान गरिएको हो । सम्मानस्वरूप दुवै स्रष्टालाई जनही एक लाख रुपैयाँ नगदसहित ताम्रपत्र प्रदान गरिएको प्रतिष्ठानले जनाएको छ ।

यसैगरी, ‘सुशीला आचार्य सुस्वास्थ्य कामना सम्मान–२०८२’ संगीतकर्मी दीपक थापा र अभिनेता पवन मैनालीलाई प्रदान गरिएको छ । उक्त सम्मानअन्तर्गत उनीहरूलाई जनही ५० हजार रुपैयाँ नगद प्रदान गरिएको थियो । स्वास्थ्य उपचार आवश्यक पर्ने कलाकारहरूलाई सहयोग तथा हौसला प्रदान गर्ने उद्देश्यले यो सम्मान स्थापना गरिएको प्रतिष्ठानले जनाएको छ ।

कार्यक्रममा प्रतिष्ठानकी अध्यक्ष सुशीला आचार्य तथा सिटी एक्सप्रेस मनि ट्रान्सफरका संस्थापक एवं प्रबन्ध निर्देशक चन्द्र टण्डनले सम्मानित व्यक्तित्वहरूलाई सम्मानपत्र र नगद पुरस्कार हस्तान्तरण गरेका थिए ।

भक्तराज आचार्य नेपाली संगीत क्षेत्रका अत्यन्त सम्मानित गायकका रूपमा परिचित थिए । उनको २०८० सालको फागुन महिनामा निधन भएको थियो ।

प्रकाशित मिति: सोमबार, जेठ २५, २०८३ १४:१३

प्रतिक्रिया दिनुहोस्