जर्सी सिटी काउन्सिलबाट गायक युवराज चौलागाईं सम्मानित

म्यूजिक

गृहपृष्ठ
म्यूजिक
जर्सी सिटी काउन्सिलबाट गायक युवराज चौलागाईं सम्मानित

जर्सी सिटी काउन्सिलबाट गायक युवराज चौलागाईं सम्मानित

बिहीबार, असार ३२, २०८३ रंगसंसार

अमेरिकाको न्युजर्सीस्थित जर्सी सिटी काउन्सिलले नेपाली पार्श्वगायक, संगीतकार तथा कलाकार युवराज चौलागाईंलाई नेपाली संगीत, संस्कृति र प्रवासी नेपाली समुदायमा पुर्‍याएको योगदानको कदर गर्दै सम्मान गरेको छ । जर्सी सिटी हलमा आयोजित समारोहमा डा. विष्णुमाया परियारले सम्मानपत्र हस्तान्तरण गर्नुभएको हो ।

दुई दशकभन्दा बढी समयदेखि नेपाली संगीत क्षेत्रमा सक्रिय चौलागाईंले ४०० भन्दा बढी गीतमा स्वर दिँदै नेपाली सांगीतिक पहिचानलाई अन्तर्राष्ट्रियस्तरसम्म पुर्‍याउन महत्त्वपूर्ण योगदान दिएको सम्मानपत्रमा उल्लेख छ । साथै नयाँ पुस्ताका कलाकारलाई प्रेरित गर्ने, नेपाली संगीत सम्पदाको संरक्षण गर्ने र विश्वभरका नेपाली समुदायबीच सांस्कृतिक सम्बन्ध सुदृढ बनाउन खेलेको भूमिकाको पनि प्रशंसा गरिएको छ ।

न्यूयोर्कबाट प्रकाशित हुने ‘नेपयोर्क’को चौथो वार्षिकोत्सवका अवसरमा प्रदान गरिएको उक्त सम्मान चौलागाईंको सांगीतिक यात्रा र सांस्कृतिक योगदानको उच्च मूल्यांकनका रूपमा लिइएको छ । रेकर्डिङ स्टुडियोसँगै देश–विदेशका सांगीतिक मञ्चमा सक्रिय चौलागाईं नयाँ प्रतिभाको मार्गदर्शन र संगीत सिर्जनामा पनि निरन्तर संलग्न रहँदै आउनुभएको छ । उहाँले एनएफडिसी राष्ट्रिय चलचित्र अवार्ड, नेफ्टा अवार्ड, इनास अवार्ड, कालिका अवार्ड, फान अवार्ड, बिन्दबासिनी अवार्ड, म्युजिक खबर म्युजिक अवार्ड र सगरमाथा म्युजिक अवार्डलगायत दर्जनौं राष्ट्रिय सम्मान तथा पुरस्कार प्राप्त गरिसक्नुभएको छ ।

प्रकाशित मिति: बिहीबार, असार ३२, २०८३ १४:०५

प्रतिक्रिया दिनुहोस्