एउटै फिल्ममा पल र प्रदीप

फिल्म

गृहपृष्ठ
फिल्म
एउटै फिल्ममा पल र प्रदीप

एउटै फिल्ममा पल र प्रदीप

शुक्रबार, असार ८, २०८० रंगसंसार

नेपाली फिल्मका चल्तीका अभिनेताद्वय प्रदीप खड्का र पल शाहलाई एउटै फिल्ममा हेर्ने दर्शकको इच्छा अब पूरा हुने भएको छ । दिनेश राउतको निर्देशनमा बन्न लागेको एक फिल्ममा उनीहरुले एकसाथ काम गर्न लागेका हुन् । नाम तय नभैसकेको फिल्ममा उनीहरु दुवै प्रोटागोनिस्ट पात्रको रुपमा रहने लेखक विकास सुवेदीले जानकारी दिए । फिल्ममा दुवैको बराबर भूमिका रहनेछ ।

सामाजिक विषयवस्तुमा निर्माण हुन लागेको फिल्मको छायांकन आगामी भदौबाट सुरु हुनेछ । फिल्मका लागि पलले असार दोस्रो हप्ताबाट कलाकार अनुप बरालबाट अभिनय सिक्दैछन् । यसअघि फिल्म ‘प्रकाश’का लागि प्रदीपले पनि बरालबाट तीन महिना अभिनय सिकेका थिए । फिल्ममा अहिलेलाई पल र प्रदीप मात्र निश्चित छन् । फिल्मको स्क्रिप्टको ‘फर्स्ट ड्राफ्ट’ सकिसकेको छ ।

दिनेशको पलसँग पहिलो सहकार्य हो । पलले नै उनीसँग काम गर्ने इच्छा देखाएका हुन् । दिनेशले प्रदीपसँग भने गत वर्ष प्रदर्शित फिल्म ‘प्रकाश’मा सहकार्य गरेका थिए । यो फिल्ममा प्रदीपको अभिनयको प्रशंसा भएको थियो । ‘प्रकाश’पछि प्रदीपलाई निर्देशक राउतप्रति पूर्ण विश्वास छ । दिनेश राउतले निर्देशन गर्ने कुनै पनि फिल्मको उनी स्क्रिप्ट नहेरी सम्झौता गर्न तयार रहेको बताइन्छ ।

प्रदीप र पलले यसअघि निर्माता सन्तोष सेनको फिल्म ‘हुतुतु’मा एकसाथ काम गर्ने निश्चित भएको थियो । तर, निर्देशक छेतेन गुरुङको निधन भएपछि फिल्मको काम अगाडि बढ्न सकेको छैन । अब यी दुई स्टारलाई लिएर निर्देशक राउत फिल्म बनाउन कसिएका छन् । उनीलाई एकसाथ पर्दामा हेर्न दर्शकलाई पनि रोचक हुनेछ । व्यावसायिक सफलताको सम्भावना पनि प्रवल देखिन्छ ।

प्रकाशित मिति: शुक्रबार, असार ८, २०८० १३:५९

प्रतिक्रिया दिनुहोस्