आदरणीय आमाबुवा, दाजुभाइ, दिदीबहिनीहरु ।
देश निर्माणमा थोरै भए पनि योगदान पुर्याउ पवित्र इरादा बोकेर २०७२ सालको महाभुकम्पको बेला कार्यक्रमको शिलशिलामा अमेरिकामा भएका हामी सम्पुर्ण कार्यक्रमहरु रद्ध गरेर नेपाल फर्केर निरन्तर सामाजिक कर्ममा होमिएको यहाँहरु सबैमा सर्वविधितै छ । समाजसेवाको पवित्र उदेश्य बोकेर काम गर्दा पनि पछिल्लो पाँच वर्षमा हामीले धेरै लान्छना खेप्यौं । अकल्पनीय भुक्तमान भोग्यौं । हामीविरुद्ध अनेकन अफवाह फैलाइए । हामीलाई हृदयदेखि नै माया गर्ने हाम्रा शुभचिन्तकमाझ पनि अनेकौ शंका उपशंका हुने गरि भ्रमको खेती गरियो । हिजोका दिनमा केही बोल्दा एक थुकी सुकी, कता कता विलीन हुन्थ्यो । सो समयमा हामीले चाहेर पनि मुख खोल्न सकिएन ।
तर अहीले हामीलाई लाग्छकी सबै कुरा ब्यक्त गर्ने सहि समय आएको छ । आज हाम्रो पिडामा हजुरहरुले हामीप्रति देखाउनु भएको सहानुभूति र ऐक्यवद्धताले आज यहाँहरुमाझ सबै कुराहरु व्यक्त गर्न ठुलो शक्ति मिलेको छ । तर, जुन समस्याबाट हामी गुज्रिरहेका छौ, त्यो समस्याको अझै समाधान भएको छैन । अहिले पनि १८ करोड ४३ लाख रुपैयाँ आर्थिक दायित्वको बोझ हाम्रो टाउकोबाट उत्रिएको छैन । सरकारी कार्यालयदेखि अड्डा–अदालतहरुको चक्कर लाउँदा–लाउँदा हत्तु हैरान भइसकेका छौ । हामी पूर्णरुपमा रित्तिएका छौं । केवल याचना बाँकी छ । र बाँकी छ, आफ्नो इमान्दारिता र असल नियतप्रतिको दृढ विश्वास ।
भनिरहनु नपर्ला कि यो आर्थिक दायित्व हाम्रो कुनै निजी प्रयोजनले सिर्जना गरेको होइन । रंगशाला निर्माणका क्रममा उधारोमा खसालिएका निर्माण सामग्रीहरुको बक्यौता रकम हो । भरतपुर महानगरपालिकालाई फाउन्डेसनले ५९ करोड ९० लाख १ हजार ८ सय ६६ रुपैयाँ (पछिल्लोपटक पुल्चोक इन्जिनियरिङ अध्ययन संस्थानले गरेको प्राविधिक मूल्यांकन प्रतिवेदन अनुसार) बराबरको भौतिक संरचना सुम्पियो । २ करोड ४६ लाख २१ हजार ६ सय ७० रुपैयाँ ४ पैसा बराबरको स्टक निर्माण सामग्री जिम्मा लगायौं । तर फाउन्डेसनको १८ करोड ४३ लाख ४ सय २४ रुपैयाँ (महानगरबाट भएको अडिट रिपोर्ट अनुसार) बक्यौता रकम भने महानगरपालिको तर्फबाट भुक्तानी हुनसकेन । राज्यले सम्पत्ति सकार्न मिल्ने, तर दायित्व सकार्ने नमिल्ने यो कस्तो बिडम्बना ? फाउन्डेसनले बनाइदिएको संरचनामाथि नै महानगरले अहिले थप निर्माण गरिरहेको छ । तर, अपराधी जसरी अपजसको पात्र हामीलाई बनाइयो ।
यो बीचमा हामीले गरेको कामको विभिन्न सरकारी निकायबाट आधा दर्जनपटक अनेक नामका छानविन भए । कहीँ कतै पनि कैफियत देखिएको छैन । एक रुपैयाँ पनि हिनामिना भएको प्रमाण भेटिएको छैन । अख्तियारदेखि सतर्कता केन्द्रसम्मले क्लीन चिट दिएका छन् । तर, पनि कतिपयले अझै पनि ‘ठग’ को उपमा दिन छाडेका छैनन् । आफ्नो पेशा–व्यवसायलाई थाँति राखेर, जहान परिवारप्रतिको दायित्व पन्छाएर राष्ट्रका लागि केही गर्न भनेर हिँड्दा हामीले पाएको ‘पुरस्कार’ यही हो त ?
हो, हामीले रंगशाला निर्माणलाई टुंगोमा पुर्याउन सकेनौं । तर, सबै प्रयास त लगाएका हौं नि । जनसहयोग जुटाएर करिब ६० करोड रुपैयाँ बराबरको सम्पति राज्यलाई दिएका पनि त हौं नि । के हाम्रो कामको अलिकति पनि सकारात्मक मूल्यांकन हुनु पर्दैन ? के हामीले प्रेमप्रसाद आचार्यझैं न्यायका लागि सिंहदरबार अगाडि आत्मदाह नै गर्नुपर्ने थियो ?
म क्रिकेट नबुझ्ने मान्छे थिएँ । देश–विदेशका थुप्रै क्रिकेट खेलाडीहरु चिन्थेँ, तर क्रिकेटको बारेमा केही ज्ञान थिएन । फुटबल हेर्न बारम्बार रंगशाला जाने गरे पनि क्रिकेट कहिल्यै प्रत्यक्ष हेरेको थिइनँ । जब नेपालले एकदिवसीय राष्ट्रको मान्यता पायो, देशमा एउटा अन्तर्राष्ट्रिय स्तरको क्रिकेट रंगशालाको माग चौतर्फी रुपमा सुनियो । क्रिकेटको यति ठूलो क्रेज भएको देशमा एउटा अन्तर्राष्ट्रिय स्तरको रंगशाला नहुनु साँच्चै बिडम्बनाको स्थिति थियो । यद्यपि, हामीले आफ्नो अगूवाइमा क्रिकेट रंगशाला निर्माण गर्ने योजना बनाएका थिएनौं ।
हामी त्यसबेला ‘नमूना नेपाल’ नामको मौलिक परियोजनाको अबधारणा सार्वजनिक गरेर अघि बढेका थियौं । तर, हामीलाई सो क्रिकेट रंगशाला निर्माणका लागि अभियान चलाउन सामाजिक सञ्जाल र अन्य माध्यमहरुबाट क्रिकेटप्रेमीहरुले घच्घच्याउन थाल्नुभयो । तपाईंहरुले सक्नुहुन्छ भनेर हौसला दिनुभयो । हामीले यसअघि देशविदेशमा रहेका नेपालीहरुबाट आर्थिक सहयोग जुटाएर चारवटा नमूना वस्ति तथा वीर अस्पताल रंगरोगन र सरसफाइ अभियान छोटो समयमा सम्पन्न गरेको ट्र्याक रेकर्डका कारण आमजनतामा हामीप्रति ठूलो भरोसा कायम भएको थियो । त्यही मोडालिटीबाट रंगशाला निर्माण गर्न हामीलाई सबैले हौस्याउनुभयो ।
हामी अलमलमै थियौं । अरबौंको परियोजना आँटिहाल्न सजिलो थिएन । मैले फेसबुकमा सबैसामु प्रश्न राखेँ – नमूना नेपाल कि क्रिकेट रंगशाला ? हजारौं कमेन्टहरु आए । सतप्रतिशतले नै क्रिकेट रंगशालाको पक्षमा मत दिनुभयो । कमेन्ट बक्समै कयौंले आर्थिक सहयोगको प्रतिवद्धता जनाउनुभयो । अन्ततः हामी नमूना नेपालको योजना थाँति राखेर रंगशाला निर्माणतर्फ मोडियौँ ।
क्रिकेटप्रेमी जनताको आह्वानमा बहकिएर मात्रै हामी यसमा हाम्फालेका भने होइनौं । राज्यको उच्चस्तरबाटै प्रोत्साहन र आर्थिक प्रतिबद्धता अनि विज्ञहरुसंगको परामर्शपछि मात्रै निर्माणको निर्णय लिइएको हो । धुर्मुस–सुन्तली फाउन्डेसनले राज्यसँगकै सहकार्यमा यो परियोजना सुरु गरेको हो । भरतपुर महानगरपालिकाले नै हामीलाई डाकेर रंगशाला निर्माणको अगूवाइ लिन अनुरोध गरेको थियो र जग्गासमेत उपलब्ध गराएको थियो । बाग्मती प्रदेश सरकार र केन्द्रीय सरकारबाट समेत हामीलाई बलियो समर्थन र हौसला मिलेको थियो ।
२०७५ साल माघ १६ गते भरतपुर महानगरपालिकासँग फाउन्डेसनको सम्झौता भयो । सहमतिपत्रमा हस्ताक्षर गर्ने कार्यक्रममा तत्कालीन प्रधानमन्त्री पुष्पकमल दाहाल प्रचण्ड र पुर्व प्रधानमन्त्री केपी शर्मा ओलीदेखि सबै पार्टीका प्रमुख नेताहरु उपस्थित हुनुहुन्थ्यो । सबैले हामी तपाईंहरुको साथमा छौं भनेर आडभरोसा दिनुभएको थियो । भरतपुर महानगर प्रमुख रेणु दाहाल र मैले सहमतिपत्रमा हस्ताक्षर गरेका थियौं । उक्त सहमतिपत्रको बुँदा नम्बर ६ मा ‘यदि स्रोत जुट्न नसकेको खण्डमा दुवै पक्षको दायित्व रहने’ उल्लेख छ । राज्य संयन्त्रहरुसँग गरिएका लिखित सम्झौता र जिम्मेवार व्यक्तिहरुका मौखिक प्रतिबद्धतालाई विश्वास गर्नु नै हाम्रो भुल थियो त ?
राज्यले बनाउनुपर्ने यति ठूलो परियोजना किन आँटेको भन्ने प्रश्न धेरैले गर्नुहुन्छ । हामी पनि भन्छौं, राज्यले नै बनाउनुपर्ने हो । तर, राज्यले यो कामलाई त्यसबेलासम्म प्राथमिकतामा राखेको थिएन । मुलपानी रंगशाला वर्षौंदेखि अलपत्र थियो । नेपाल क्रिकेट संघ (क्यान) नै आइसीसीबाट निलम्बित थियो । यदि सरकार वा क्यानले गरेको भए क्रिकेटप्रेमीहरुले हामीलाई किन घच्घच्याउँथे ?
विश्वमै उदाहरणीय हुने गरी सरकार र जनताको सहकार्यमा एउटा भव्य एवं मौलिक रंगशाला निर्माण गर्न हामी कस्सिएका हौं । हामी महत्वाकांक्षी भयौं होला, तर हाम्रो नियत कसरी गलत हुन सक्थ्यो ? यसमा हाम्रो निजी स्वार्थ के हुन सक्थ्यो ? यो बोझ उठाउनुको साटो हामी आनन्दले आफ्नो पेशा–व्यवसायमै रमाएर बस्न सक्थ्यौं नि होइन ?
धुर्मुस–सुन्तली फाउन्डेसनको खातामा भएको दुई करोड १४ लाख रुपैयाँबाट रंगशालाको काम सुरु गरिएको थियो । सुरुबाटै सोचेजस्तो रफ्तारमा आर्थिक संकलन हुन सकेन । तर कामको रफ्तार भने अतुलनीय थियो । दैनिक विहान ५ बजेदेखि अबेर रातिसम्म अनवरत काम हुन्थ्यो । स्रोतको समस्या नपरेको भए हामीले तोकिएको अवधिभित्रै रंगशालालाई पूर्णता दिनेमा कुनै शंका थिएन ।
आर्थिक संकलन गर्न सबै उपाय लगाइएकै हो । भरतपुर महानगरपालिकाकै अगूवाइमा धनधान्याञ्चल महायज्ञ आयोजना गरियो । उक्त महायज्ञमा ६९ करोड रुपैयाँको कबोल भएपछि हाम्रो आत्मबल निकै बढ्यो । ५१ करोड बराबरको कबोल त सरकारी निकायहरुबाटै भएको थियो । भरतपुर महानगरपालिका १६ करोड ७५ लाख दिन तयार भयो । बाग्मती प्रदेशबाट ३० करोड रुपैयाको प्रतिबद्धता प्राप्त भयो । बाग्मतीका तत्कालीन मुख्यमन्त्री डोरमणी पौडेल आफैं महायज्ञमा उपस्थित भएर सो रकम कबोल गर्नुभएको थियो । जिल्ला समन्वय समिति चितवनबाट २ करोड २२ लाखलगायत विभिन्न पालिकाहरुबाट अनुदानको घोषणा भएका थिए ।
एउटा पवित्र धार्मिक अनुष्ठानमा यसरी कबोल गरिएको पैसा पक्कै उठ्छ भन्ने विश्वासमा हामीले आर्थिक अभावबीच पनि उधारोमा सामान झार्दै रंगशाला निर्माणलाई तीव्रता दिइरह्यौं । महानगरपालिकाबाट पनि हामीलाई स्रोतको चिन्ता नलिइकन खुरुखुरु काम अगाडि बढाउने सन्देश आइरहेको थियो । महानगरपालिकाकै सम्पत्ति निर्माण भइरहेकाले उसलाई नै अभिभावक ठानेर ढुक्कसित हामीले काम अगाडि बढायौं ।
तर, महायज्ञमा कबोल भएको ठूलो हिस्सा रकम संकलन नै हुन सकेन । ६९ करोड कबोल भएकोमा फाउन्डेसनले जम्माजम्मी ९ करोड ४१ लाख मात्र प्राप्त गऱ्यो । कम्तिमा सरकारी निकायहरुबाट प्रतिवद्धता व्यक्त भएको पैसा आउने आशामा उधारोमा सामान ओसारिएको थियो । तर, ३० करोड बोलेको बाग्मती प्रदेश सरकारले ३ करोड मात्रै दियो । भरतपुर महानगरले १६ करोड ७५ लाख बोलेकोमा ८ करोड ५ लाख प्राप्त भयो, त्यो पनि महायज्ञ शीर्षकमा होइन, अनुदानमा । महायज्ञमा कबोल भएको सबै रकम उठेको भए मात्र पनि अन्तर्राष्ट्रिय स्तरको खेल आयोजना गर्न सकिनेगरी संरचना तयार गर्न सकिन्थ्यो । हामी उधारोमा फँस्ने थिएनौं ।
केही उपाय नलागेपछि आर्थिक संकलनकै लागि हामी मेची–महाकाली अभियानमा निस्कियौं । तर, हाम्रो अभियान सुरु भएलगत्तै रंगशालाका लागि महानगरले उपलब्ध गराएको जग्गाको विषयलाई लिएर विवाद निकालियो । त्रिभुवन विश्वविद्यालयको जग्गा हामीले दुरुपयोग गरेको आरोप लगाइयो । जबकि उक्त जग्गा हामीले रोजेर लिएको होइन । महानगरले दिलाएको हो । जग्गाप्राप्तिमा हाम्रो भूमिका केही पनि थिएन । विवादकै कारण हाम्रो मेची–महाकाली अभियान प्रभावकारी हुन सकेन र बीचमै स्थगित गर्नुपर्यो ।
आर्थिक वर्ष २०७८/०७९ मा संघीय सरकारले नै गौतमबुद्ध रंगशाला शीर्षकमा २२ करोड रुपैयाँ बजेट छुट्याइएको थियो । बजेटमै परेपछि त पक्कै आउँछ भन्ने लागेर पनि हामीले उधारोमा काम गरिरहेका थियौं । तर, रातो किताबमा समेत चढिसकेको रकम कहिल्यै निकासा भएन । कारण एउटै थियो रंगशाला निर्माण शुरु हुनु भन्दा अघि संघीय सरकार, प्रदेश सरकार र स्वयं भरतपुर महानगरपालकिाले सोझै फाउन्डेसनलाई अनुदान दिन मिल्छ भनेर निर्माणको अगुवाई गर्न प्रेरित गरियो जव निर्माण शुरु भयो अनुदानमा मिल्दैन राज्यले नै ठेक्का लाउनुपर्छ भन्दै पटक पटक रकम फ्रिज गर्ने कार्य भइरह्यो । बागमती प्रदेश सरकारले पनि पटकपटक बजेटमा राख्यो तर निकाशा भने गरेन ।
उधारो चुलिँदै गएपछि २०७८ साल साउन २२ गतेबाट हामी निर्माण कार्य स्थगित गर्न बाध्य भयौं । सो पश्चात सम्झौताअनुसार पुस २ गते हामीले महानगरपालिकालाई स्वामित्व हस्तान्तरणका लागि लिखित पत्र दियौं । महानगरपालिकाले यो संरचना जिम्मा लिँदा सबै आर्थिक दायित्व एक महिनाभित्र फरफारक गरेर हामीलाई सम्मानसहित विदा गर्ने प्रतिवद्धता जनाएको थियो ।
हामीले पत्र पठाए लगत्तै महानगरले रंगशालाको हरहिसाब तथा भौतिक संरचनाको चेकजाँच गर्न मूल्यांकन समिति गठन गर्यो । हामीसँग आर्थिक तथा भौतिक लेखापरीक्षण प्रतिवेदन मागियो । हामीले तत्काल बुझायौं । हाम्रो आर्थिक प्रतिवेदनको मूल्यांकन गर्नका लागि महानगरले जी. प्रकाश एन्ड एसोसिएट्स चार्टर्ड एकाउन्टेन्सलाई जिम्मा दियो । प्राविधिक लेखापरीक्षणका लागि सरकार मातहतको सघन सहरी तथा भवन निर्माण आयोजना चितवनलाई दिइयो । हरहिसाबको मूल्यांकन नसकिँदै २०७८ साल माघ २० गते महानगरबाट हाम्रो मञ्जुरीनामा लिने काम भयो ।
जी.प्रकाशले माघ २८ गते आयोजनाको लेखा परीक्षण प्रतिवेदन महानगरलाई बुझायो । त्यसबेला हामी चितवनमै थियौँ । तर, हामीलाई प्रतिवेदन हेर्न समेत दिइएन । तत्कालीन प्रमुख प्रशासकीय अधिकृत रामवन्धु सुबेदीसँग प्रतिवेदन माग्दा उहाँले एकैचोटि केन्द्र सरकारमा ‘फरवार्ड’ गर्ने हो भनेर उपलब्ध गराउनु भएन ।
रंगशालाको आर्थिक तथा भौतिक प्रतिवेदन महानगरबाट संघीय मामिला तथा सामान्य प्रशासन मन्त्रालय हुँदै युवा तथा खेलकुद मन्त्रालयमा पठाइयो । बाहिर हामीमाथी अनेकन प्रश्नहरु उठिरहेका थिए । तर, सरकारी प्रतिवेदन न सार्वजनिक भयो, न हामीले हेर्न पायौं । प्रतिवेदन नपाइकन हामीले बाहिर बोल्न उचित ठानेनौं । सायद त्यो हाम्रो कमजोरी पनि थियो । हामी नबोल्दा निरन्तर भ्रम र अफवाहहरु फैलिइरहे ।
प्रतिवेदन काठमाडौं आएपछि सुरु भयो मेरो सरकारी अड्डाहरुको गोलचक्कर । यो पाँचवर्षमा मैले सिंहदरबारको कतिपटक फेरो लगाएँ, कुनै लेखाजोखा छैन । शनिबारको दिनसमेत ट्याक्सीमा कागजका ठेली बोकेर सिंहदरबार पसेको छु । घन्टौंघन्टा प्रधानमन्त्री, मन्त्रीदेखि सरकारी कर्मचारीहरुको दैलो ढुकेको छु । यसैबीच २०७८ साल माघ २ गते हामीविरुद्ध अख्तियार दुरुपयोग अनुसन्धान आयोगमा उजुरी हालीएको समाचार मिडियामा आयो । त्यसबेला म कोराना संक्रमित भएर आइसोलेसनमा थिएँ । प्रमाणका ठेली बोकेर अख्तियार धाउनुपर्ने भयो । अख्तियारबाट बारम्बार आउने चिठी र फोनको घन्टीले दिक्दार पार्थ्यो ।
भरतपुरबाट प्रतिवेदन आएपछि संघीय युवा तथा खेलकुद मन्त्रालयले २०७८ साल फागुन ५ गते यसलाई अध्ययन गर्न भन्दै सहसचिव विदुरप्रसाद खनालको संयोजकत्वमा एउटा समिति गठन गर्यो । महालेखा नियन्त्रक, खेलकुद मन्त्रालय, खेलकुद परिषद् र सहरी विकासका प्रतिनिधिहरु सदस्य रहेको उक्त समितिलाई एक हप्तामा अध्ययन गरेर मन्त्रीपरिषदमा रिपोर्ट पेश गर्न भनिएको थियो । तर, एक हप्तासम्म समितिका पदाधिकारीलाई चिठीसम्म पुगेन । म आफैं चिठी बोकेर पदाधिकारी खोज्दै यता र उता कुद्नुपर्यो ।
बल्लतल्ल काम थालेको उक्त समितिले स्थानीय तहको मूल्यांकनले नहुने र आफूहरुले फेरि मूल्यांकन गर्नुपर्ने भन्दै हामीसँग कागजातहरु माग्यो । म फाउन्डेसनका तत्कालीन एकाउन्टेन्ट र इन्जिनियर बोकेर सिंहदरबारदेखि भरतपुरसम्म धाउन थालेँ । समितिले चार महिना लगाएर मूल्यांकन गर्यो, तर कुनै प्रतिवेदन दिएन । अन्तिममा समितिले हाम्रो सम्झौता नेपाल सरकारसँग नभएका कारण महानगरपालिकाले नै रकम भुक्तानी गर्नुपर्ने भनेर पन्छाइदियो । हाम्रो सम्झौता महानगरसँग हो भन्ने त समितिलाई सुरुमै थाहा थियो । तर, चार महिनासम्म अध्ययनको नाममा किन दुख र हैरानी दिइयो भन्ने हामीले बुझ्न सकेनौं ।
फेरि हामी भरतपुर नै धाउन थाल्यौ । तर भरतपुरले फेरि केन्द्र सरकारमै पठायो । फेरि सिंहदरबार धाउन थालियो । शेरबहादुर देउवा सरकारले फेरि आयोजनाको मूल्यांकन गर्ने भन्दै २०७९ साल साउन ९ गते मन्त्रीपरिषदबाट शहरी विकास मन्त्रालयका सहसचिव इन्जिनियर प्रकृण तुलाधरको नेतृत्वमा प्राविधिक समिति बनाइयो । उक्त समितिको पछि लागेर हामी फेरि काठमाडौंदेखि चितवनको चक्कर काट्न थाल्यौं ।
फाउन्डेसनका एकाउन्टेन्ट इन्जिनियरहरु जागीर छोडेर कता–कता पुगिसकेका थिए । सबैलाई खोज्दै डकुमेन्टका ढड्डाहरु बोकेर घरी चितवन, घरी सिंहदरबार धाईरह्यौं । एक महिनाभन्दा बढी समय लगाएर समितिले छानविन सक्यो र मन्त्रीपरिषदमा पठायो । अब त टुंगियो भनेर तत्कालीन मुख्य सचिव शंकरदास बैरागीलाई भेट्न पुगेँ । तर, उहाँले समितिको प्रतिवेदनमा निर्णय गर्ने बुँदा नै नलेखेको हुँदा मन्त्रीपरिषदले केही गर्न नसक्ने बताउनुभयो । दशैं पछाडि केही उपाय लगाउने आश्वासन दिएर पठाउनुभयो ।
दशैं–तिहार सकिए । तर, कुनै निर्णय भएन । त्यसपछि चुनाव नजिकियो । चुनावको आचारसंहिता लाग्ने बताइयो । म यता र उता भौतारिइरहेँ । उधारोमा सामान दिने पार्र्टीरुबाट तारन्तार बज्ने फोनले राति राम्ररी निदाउन पनि नसक्ने अवस्था भइसकेको थियो ।
चुनाव सकिएपछि प्रचण्ड प्रधानमन्त्री बन्नुभयो । उपप्रधानमन्त्री तथा गृहमन्त्री रवि लामिछाने हुनुभयो । अब मलाई ठूलो आशा जाग्यो । प्रचण्डले नै हामीलाई चितवनमा रंगशाला बनाउन प्रेरित गर्नुभएको हो । उहाँले त्यसबेला त एक अर्ब राज्यकोषबाटै छुट्याइदिने मौखिक आश्वासनसमेत दिनुभएको थियो । उहाँ फेरि प्रधानमन्त्रीको कुर्सीमा फर्किएपछि पक्कै अब समाधान हुन्छ भनेर ढुक्क भयौं । त्यसमाथी गृहमन्त्री रवि लामिछानेले त सुरुमा यो अभियानमा हामीलाई प्रत्यक्ष साथ दिनुभएको हो । हामी सितै विभिन्न ठाउँमा जग्गा हेर्न समेत जानुभएको थियो । उहाँले हाम्रो पीरमर्का बुझ्नु हुन्छ भन्ने लाग्यो । उहाँहरु दुवैलाई भेटेर मैले आफ्नो पीडा सुनाएँ । दुवैजनाले मलाई सान्त्वना र आश्वासन दिनुभयो । प्रधानमन्त्रीले एक हप्ताभित्र मन्त्रीपरिषदबाट निर्णय गराउने प्रतिवद्धता जनाउनुभयो ।
अन्ततः २०७९ चैत्र २० गते मन्त्रीपरिषद वैठकले फाउन्डेसनलाई खेलकुद परिषदमार्फत १२ करोड रुपैयाँ अनुदान उपलब्ध गराउने निर्णय गर्यो । बाँकी ६ करोडका लागि अर्को निर्णय हुने आश्वासन दिइयो । तिर्नु छ १८ करोड १२ हुँदा पनि हामीले ठूलो राहत महसुस गर्यौ । रकम भुक्तानीका लागि खेलकुद परिषद धाउन थालेँ म । तर, तीन महिनासम्म धाउँदा पनि रकम भुक्तानी भएन । परिषदले मन्त्रीपरिषदको निर्णयका बाबजुद आफूहरुसँग फाउन्डेसनको सम्झौता नभएकाले रकम दिन नसक्ने भन्दै असमर्थता दर्शायो । भरतपुर महानगरबाटै भुक्तानी हुनुपर्ने परिषदका अधिकारीहरुले बताए ।
हामी फेरि भरतपुर धाउन थाल्यौं । भरतपुरबाट केन्द्रमा पहल भएपछि २०८० साल असार १२ गते फेरि मन्त्रीपरिषदले त्यही १२ करोडका लागि दोस्रोपटक निर्णय गर्यो । म आफैं मन्त्रीपरिषदको पत्र बोकेर अर्थमन्त्रालय पुगेँ । अर्थबाट दुई दिनमा तोक लगाएर १८ गते महानगरको खातामा १२ करोड निकासा भयो । असार १९ गते फेरि म आफैं अर्थको चिठी लिएर महानगरमा पुगेँ । तर, पनि महानगरले पैसा दिएन । केन्द्रबाट आएको चिठीमा भाषा नमिलेको भन्दै रकम दिन इन्कार गरियो । चिठी सच्चिएर आउने भनेर म चितवनमै बसिरहेँ । तर, असार २४ गते त्यो आर्थिक वर्ष नै सकियो र उक्त रकम फ्रिज भएर फेरि अर्थ मन्त्रालयमै फर्कियो ।
भरतपुरका तत्कालिन आर्थिक प्रशासन प्रमुख जगन्नाथ अर्यालले यो सशर्त अनुदानको पैसा भएकाले साउनको पहिलो हप्तामै फर्केर आउने र २० गतेसम्म भुक्तानी गरिने भन्दै हामीलाई ढुक्क बनाउनुभयो । त्यसपछि म काठमाडौं फर्किएँ । साउनको ११ गते भरतपुरले ‘बजेट माग सम्वन्धमा’ भनेर संघीय मामला मन्त्रालयलाई चिठी पठायो र मलाई नै फलोअप गर्न सुझाव दियो । म दौडिँदै संघीय मामिला मन्त्रालयमा गएँ । मन्त्रालयको इमेलबाट चिठी निकाल्न लगाएर टिप्पणी उठाएर सचिवको तोक लगाएर अर्थ मन्त्रालयको बजेट महाशाखामा पु¥याएँ । तत्कालीन महाशाखा प्रमुख उत्तर खत्री सरले मलाई देख्नेवित्तिकै भन्नुभयो– काम बन्यो होइन ? खोइ लड्डु ल्याएको ?’
मैले यताबाट भरतपुरलाई पठाएको चिठीमा भाषा नमिलेकोले रकम भुक्तानी नभएको जानकारी गराएँ । उहाँले भन्नुभयो– सिस्टमको भाषा यही नै हो, उनीहरु (भरतपुर महानगर)ले तपाईंलाई डुबाएछन् । म खंग्रङ्ग भए । अब के गर्ने सर भन्दा फेरि मन्त्रीपरिषदबाट निर्णय गर्नुपर्ने भनेर मुख्य सचिवलाई भेटिहाल्न सुझाव दिनुभयो । म फेरि मुख्य सचिव डा. वैकुण्ठ अर्याललाई भेट्न पुगेँ । उहाँले पनि ‘भरतपुरले पैसा दिएन ?’ भन्दै अब संघीय मामिला मन्त्रालयमार्फत प्रस्ताव लिएर आउन भन्नुभयो । म भोलीपल्टै मन्त्री अमनलाल मोदी र सचिव डा.कृष्णहरी पुष्करको चेम्बरमा पुगेँ । उहाँहरुले फेरि खेलकुद मन्त्रालय जान भन्नुभयो । खेलकुद मन्त्रालय पुग्दा प्रधानमन्त्री कार्यालय नै जान भनियो ।
हप्तौदिन धाएपछि मैले फेरि मुख्य सचिवलाई भेटेर बेदना पोखेँ । उहाँले यही हप्ताको क्याबिनेटबाट निर्णय गर्ने तर तपाई भरतपुर गएर ककस्लाई रकम भुक्तानी गर्नु पर्ने हो महानगरपालिकाकै लेटरहेडमा लेखेर लिएर आउनु भन्नुभयो । मैले फेरि महानगरपालिका पुगेर चिठ्ठी लिएर मुख्य सचिवलाई बुझाँए तर, महिनौं दिन बित्दा पनि काम भएन । केही सिप नलागेपछि फेरि प्रधानमन्त्री प्रचण्डलाई नै भेटेर म घर जान्न यही ओछ्यान लगाएर सुत्छु, यो समाधान भएन भने यही मर्छु भनेर हारगुहार गरेँ । उहाँले फेरिपनि अब बस्ने क्याबिनेटबाट टुंग्याउने आश्वासन दिनुभयो । तर त्यो आश्वासनमै सिमीत रह्यो । म ज्यँदो लास भए ।
हामीले २०७५ सालमा रंगशाला घोषणा कार्यक्रम गर्दा तत्कालीन प्रधानमन्त्री केपी शर्मा ओली प्रमुख अतिथि हुनुहुन्थ्यो । तर, त्यसपछिका चार वर्षसम्म हामीले उहाँसँग भेट्न समेत पाएका थिएनौं । ताकेता गर्दा गर्दा गतवर्ष बल्लतल्ल भेटका लागि समय पाइयो । छोरीसमेत लिएर कुन्जना र म उहाँको निवास बालकोटमा पुग्यौं । छोरीको शारीरिक समस्याबारे पनि अवगत गरायौँ । हामीलाई यो जञ्जालबाट मुक्त गरिदिन बिन्ति बिसायौं । उहाँले प्रधानमन्त्री प्रचण्डसँग कुरा गर्ने आश्वासन दिनुभयो । तर कुनै प्रगति भएन ।
केही समयपछि ओली आफैं प्रधानमन्त्री बन्नुभयो । उहाँलाई फेरि ताकेता गर्न थाल्यौं । एक दिन बालुवाटारमा गएर प्रधानमन्त्रीको स्वकीय सचिव राजेश बज्राचार्यज्यूलाई सबै कुरा भनेँ । भरतपुर महानगरबाट प्रमुख प्रशासकीय अधिकृत लक्ष्मीप्रसाद पौडेल र आर्थिक प्रशासन प्रमुख जगन्नाथ अर्याललाई सिंहदरबारमा बोलाइयो । उहाँहरुलाई मन्त्रीपरिषदले निर्णय गरेर पैसा पठाउँदा ठिक हुन्छ कि बजेटमा राख्दा ठिक हुन्छ भनेर सोधियो । उहाँहरुले बजेटमा उल्लेख गर्ने हो भने हाम्रा यस्ता शर्तहरु छन् भनेर केही विषयहरु राख्नुभयो ।
त्यसका लागि तलैबाट फाइल बनाएर ल्याउनुपर्छ भनियो । वैशाखमा पुन सम्पुर्ण विल भरपाईसहित सबै चेकजाँच गरेर भरतपुर महानगरपालिकाले बोर्ड वैठकबाट निर्णय गरी संघलाई चिठी लेख्यो । त्यो सबै फाइल बोकेर हामी आफैं संघीय मामिला मन्त्रालयमा आयौं । संघीय मामिलाबाट टिप्पणी उठाएर फेरि युवा तथा खेलकुद मन्त्रालयमा गइयो । त्यहाँबाट टिप्पणी उठाएर अर्थमन्त्रालयमा पुग्यौं । अर्थबाट फेरि प्रधानमन्त्री कार्यालयमा गयौं ।
राति करिब १ बजे प्रधानमन्त्रीलाई भेटेर हारगुहार गरेपछि ‘कन्भिन्स्ड’ हुनुभयो । अनि बल्ल बजेटमा राखिने सुनिश्चितता भयो । अब त पिडामुक्त भइयो भन्ने लाग्यो । त्यसपछि बजेट भाषणमा आयो । बजेट भाषणमा ‘पुल्चोक इन्जिनियरिङ अध्ययन संस्थानले गर्ने मूल्यांकन आधारमा सिर्जित सम्पत्ति खरिदका लागि’ भनेर १५ करोड रुपैयाँ छुट्याइएको थियो । यसअघि पटक–पटक मूल्यांकन भएर तयार भएका प्रतिवेदनहरु सार्वजनिक भएका थिएनन् । फेरि पुल्चोक इन्जिनियरिङबाट मूल्यांकन हुने भन्दा दिक्क भइयो । तर, हामीसँग सरकारी प्रक्रियालाई सघाउनेबाहेक अरु विकल्प थिएन ।
त्यसबेलासम्म मलाई विभिन्न शारीरिक र मानसिक समस्याहरु देखा पर्न थालिसकेका थिए । अस्पताल धाउन थालेँ । प्राकृतिक चिकित्सालय रजहरमा २१ दिन बसेँ । काठमाडौंमा पनि थुप्रै डाक्टरहरुसँग भेटेर परामर्श लिएँ । सबैले मानसिक तनावकै कारण एन्जाइटी भएर यी लक्षण देखिएको बताउनुभयो । म आफ्नो उपचार सँगसँगै रंगशालाको संघर्षमा एकैपटक लाग्नुपर्यो ।
सरकारले बजेटमा छुट्याएको १५ करोड साउनमा भरतपुर महानगरको खातामा पुग्यो । पुल्चोकलाई मुल्यांकनको लागि चिठी लेखिदिनुपर्यो भनेर भरतपुर महानगरपालिकालाई साउन महिनाभरी लगातार ताकेता गर्यौ । महिनौं दिनपछि बल्ल चिठी लेखियो । भदौ १६ गते पुल्चोकको टिम सहित भरतपुर पुगियो । महानगर, फाउन्डेशन र संस्थानबीच त्रिपक्षीय सम्झौता भयो । एक महिनामा रिपोर्ट दिने भनिएको थियो । दुई महिनापछि रिपोर्ट आयो । त्यो रिपोर्ट बोकेर कात्तिक १३ गते भरतपुर महानगरपालिकामा पुग्यौं । रिपोर्ट बुझेपछि कार्यपालिकाको बोर्ड वैठकबाट निर्णय गर्ने भनिएको थियो । तर, त्यसो नगरी कार्यदेशका लागि भन्दै अर्थ मन्त्रालयमा चिठी लेखियो । त्यो चिठी बोकेर म आफैं आएँ । अर्थ मन्त्रालयले मेरै अनुनयविनयमा बल्लतल्ल प्रत्यूत्तर फर्कायो, जबकी केन्द्रबाट स्थानीय तहमा गएको बजेटमा यसरी अर्थको चिठी आवश्यक नै हुँदो रहेनछ ।
अर्थको जवाफी पत्रमा महानगरले चित्त बुझाएन । फेरि खेलकुद मन्त्रालय र कानून मन्त्रालयको चिठी चाहिन्छ भन्न थाल्यो । त्यो चिठी लिन आफैं काठमाडौं आँए । खेलकुद मन्त्रीलाई भेटेर बिन्ती बिसाएँ । अनि, खेलकुदको चिठी लिएर फेरि भरतपुर गएँ । अब चाहिँ हुन्छ कि भन्ने थियो । तर भएन । बोर्डको वैठकबाट तत्काल निर्णय नगरी फेरि प्रधानमन्त्री कार्यालयमा, अर्थ मन्त्रालयमा मिटिङ गर्नुपर्ने भन्न थालियो । मैले जति अनुरोध गर्दा पनि सुनुवाइ भएन । सप्लायर्सहरुले मलाई घेर्न थाले । सबै तिरबाट हार खाएर म महानगरबाट रुँदै निस्किएँ । अब महानगर कार्यालयमा फर्केर आउँदिन भने, त्यो मेरो भावावेशको अभिव्यक्ति थिएन । मैले साँच्चै हार खाएको थिएँ । म अब थप लड्न नसक्ने स्थितिमा पुगिसकेको थिएँ ।
हामीलाई ५ वर्ष घुमाएर अन्त्यमा रित्तो हात पठाइयो । यता अदालतमा म विरुद्ध सप्लायर्सले हालेका १९ वटा मुद्दा विचाराधीन छन् । भरतपुर महानगरदेखि संघीय सरकारसँग मेरो प्रश्न छ, यदि आर्थिक दायित्व बहन नै गर्नु थिएन भने पटकपटक मूल्यांकन र लेखापरीक्षण केका लागि गरिएको थियो ? अनेकौंचोटी छानविनका नाममा हामीलाई ५ वर्षसम्म हदैसम्मको सास्ती किन दिइयो ? मन्त्रीपरिषदले पटक–पटक गरेको निर्णय किन कार्यान्वयन हुँदैन ? राष्ट्रिय बजेटमा समावेश भएर निकासा समेत भइसकेको रकम भुक्तानी गर्न केले रोक्यो ?
आज हामीले नै उठाएको संरचनामाथी काम गर्दै भरतपुर महानगरले गौरव मानिरहेको छ । सरकारले यसलाई राष्ट्रिय गौरवको आयोजना नै घोषणा गरेको छ । आयोजनाको मुल सर्जकलाई यसरी प्रताडना दिएर कस्तो गौरव प्राप्त होला त ? व्यवसायीको उधारो नतिरिकन राष्ट्रिय गौरवको आयोजना पूरा हुन्छ त ?
फाउन्डेसनको नाममा रहेको बक्यौता स्थानीय तहले तिर्न मिल्दैन भनेर भरतपुर महानगरका जिम्मेवार व्यक्तिहरुले भनिरहनुभएको छ । जबकि १८ करोड ४३ लाख मध्येको विद्युत प्राधिकरणलाई फाउन्डेसनले तिर्नुपर्ने जरिवाना सहितको १० लाख ८९ हजार रुपैयाँ हामीलाई थाहै नदिई महानगरले तिरेर त्यहाँ विद्युत आपूर्ति सुचारु गर्यो । त्यो रमक चाहीँ कसरी तिर्न मिल्यो त ? अनि, त्यत्रो सम्पत्तिको स्वामित्व लिन मिल्ने तर दायित्व वहन गर्न नमिल्ने कुन कानून होला ? कानूनतः फाउन्डेसनलाई पैसा दिन मिल्ने थिएन भने भरतपुर महानगरपालिका स्वयमले निर्माणकै क्रममा ८ करोड ५ लाख कुन कानुनलाई टेकेर दियो ? बाग्मती प्रदेश सरकारले रु ३ करोड कुन कानुनलाई टेकेर दियो ?
सुरुमै पैसा नदिएको भए र थप दिन्छौं नभनेको भए हामी यति अगाडि बढ्ने नै थिएनौं । २०७८ सालमै भरतपुर महानगरले स्वामित्वको पत्र बुझ्दै दायित्व तिर्न चै मिल्दैन भनेको भए हामी उहीबेलै हरहिसाब लगायत सबै कुरा पहिल्यै सार्वजनिक गरेर कम्तिमा आर्थिकरुपमा चोखिएर बस्थ्यौं होला । हामीले यो बदनामीको भारी त बोकेर हिँड्नु पर्ने थिएन ।
हामीलाई विश्वास गरेर धेरै सहृदयी मनहरुले रंगशाला निर्माणको लागि करोडौं सहयोग गर्नुभयो । हामीसँग सम्पुर्णको अभिलेख छ तर हामीले रंगशाला निर्माणलाई पूर्णता दिन सकेनौं । यसका लागि तपाईंहरु सबैसँग क्षमाप्रार्थी छौं । सबै बलबुत्ता लगाउँदा पनि हामी चुक्नुपर्यो । आशा छ, भरतपुर महानगरले बाँकी कामलाई पूर्णता दिनेछ र देशले एउटा क्रिकेट रंगशाला पाउने छ । अहिले नेपाली क्रिकेटको लोकप्रियता र देशमै आयोजना भइरहेको एनपीएलको क्रेजले पनि हामीले थालेको अभियान गलत रहेनछ भन्ने पुष्टि भएको छ ।
रंगशालाका लागि करोडौं उधारो सामान आपूर्ति गर्नुभएका आपूर्तिकर्ताहरुप्रति म लज्जित छु । मेरो विश्वास र भरतपुर महानगरपालीकासँग संझौताको कारण, देशका लागि एउटा गर्विलो संरचना उठिरहेको देखेर तपाईंहरुले सामान उधारोमा दिनुभएको थियो । तपाईंहरुको पैसा फँसेको छ, तर पनि सबैले धैर्यधारण गरिराख्नुभएको छ । यो समस्या समाधान नभएसम्म म तपाईंहरुसँगै छु र रहनेछु । भौतिकरुपमा अहिले टाढा भए पनि म यो समस्याबाट भाग्न खोजेको नठान्नुहोला । यसको समाधान नभएसम्म म पनि सुखले निदाउँन सक्नेछैन ।
केही समयअघि मात्र हामीले आफ्नो एक मात्र छोरी सुविहानीको शारीरिक समस्या सार्वजनिक गर्यौ, जुन अहिलेसम्म लुकाएर राखेका थियौं । अहिले हामी वाध्य हुनु परेको हो, यो विषय बाहिर ल्याउन, किनकी रंगशालाकै उल्झनले छोरीलाई उपचारका लागि लैजान ढिलाइ भइरहेको थियो ।
म सिहंदरबार परिक्रमा गरिरहँदा छोरीको स्वास्थ्य क्रिटिकल बन्दै गयो । जन्मेको १६ दिनदेखी म्यानेन्जाईटिस जस्तो प्राणघातक रोगको शिकार भए संगै घुँडाको हड्डीमा समेत ईन्फेक्सन भएर दाहीने खुट्टाको घुँडाको कुर्कुरे हड्डी किटाणुले खाइदियो । उनको हाईट जति समय सम्म बढ्छ त्यती समय सम्म डक्टरको निगरानीमा राखेर उपचार गर्नुपर्ने भन्ने डाक्टरको सल्लाहअनुसार पाटन हस्पिटलमा एक महिनाको बसाई सकेर १२ बर्ष अगाडी घर फर्केका थियौं । अब छोरी फाल्गुनमा १३ लाग्छिन् । अहिले छोरीको दाहिने खुट्टा देब्रे खुट्टा भन्दा ७ सेन्टिमिटर सानो छ ।
उनी ४ बर्षको हुँदा उनको दाहिने खुट्टा बाङ्गो भएर नबढोस भनेर साईडबाट बढने हड्डी रोक्न दाहिने घुँडामा अप्रेशन गरेर भित्र स्टिल राखिएको थियो, जुन स्टिल निकाल्न अनि छोटो खुट्टाको हड्डी तन्काउने उपचार गर्न ३,४ बर्ष ढिला भईसकेको थियो । अहिले उनलाई हिड्नमा धेरै समस्या भईसकेको, हिपको जोईन्टमा उठ्दा बस्दा दुख्न थालेको छ । यो हड्डी तन्काउने उपचार लामो अनि एकदम कष्टकर छ । बाबु–आमाको लागि सन्तानभन्दा ठूलो के हुन्छ ? आफ्नो छोरीले अरुका छोराछोरीजस्तो कुद्न र खेल्न नसक्दा बाबुआमाको मन कति बिचलित होला ? त्यसैले सबै कुरा थाँती राखेर केही समय छोरीको उपचारका लागि हामी अमेरिकामा आएका छौं ।
यहाँ ल्याउनुको पनि अर्को पृष्ठभूमि छ । छोरीलाई हामीले नेपालका थुप्रै अस्पतालमा लग्यौं । भारत पनि पुर्यायौं । सबैले यसको सबैभन्दा सुरक्षित/उच्च प्रविधी सहितको उपचार अमेरिकामा हुने सुझाव दिनुभयो । तर, हाम्रो आर्थिक हैसियतले अहिले यो सम्भव थिएन ।
नेपालमा कलाकारिता पनि गर्न नसक्दा र बाँच्नसक्ने कुनै आधार नभेटेपछि ‘मरता क्या नहीँ करता’ भन्ने स्थितिमा हामीले तीन वर्षअघि अमेरिकाको ‘एक्स्ट्रा अर्डिनरी ग्रिनकार्ड’ का लागि आवेदन गरेका थियौं नेपालबाटै । यो विभिन्न विधाका असाधारण क्षमता भएकाहरुका लागि दिइने स्थायी बसोबास अनुमतीपत्र हो ।
यो कार्डमा आएपछि कम आम्दानी भएका बाबुआमाका बच्चाका लागि निशूल्क उपचार सुविधा हुने रहेछ इन्सुरेन्स/ मेडिकेडमार्फत । यसअघि कुन्जनाको कोखमा रहेको हाम्रो दोस्रो बच्चा ‘स्ट्रेस’ कै कारण खेर गएको थियो । भएकी एक मात्र सन्तानको हकमा हामीले कुनै जोखिम लिन चाहेनौं । उनको स्वास्थ्य र सुरक्षित भविष्यका लागि अमेरिकाको ‘एक्स्ट्रा अर्डिनरीमा’ एप्लाइ गर्ने निर्णय लिएका थियौं ।
आवेदन गरेको दुई वर्षपछि पोहोर साल हामीले भिसा पायौं । तर, भिसा हातमा परेको दिन हामी खुशी हुन सकेनौं, बरु भक्कानिएर रोयौं । कारण यो हाम्रो रहरको निर्णय थिएन । हामी परिस्थितिको दास बनेका थियौं । गत वर्ष हामी अमेरिका आयौं । अमेरिका आउने जाने खर्चको जोहो गर्न कुन्जनाले आफूसँग भएका सबै गरगहना बेचिन् । आएकै एक महिनामा म रंगशालाको कामले सिंहदरबार धाउन फर्किए ।
रंगशालाको दलदलबाट बाहिर निस्किएर मात्र हामी छोरीको उपचारका लागि अमेरिका जान चाहन्थ्यौं । भरतपुर महानगरपालिका र संघीय सरकारलाई छोरीको उपचारको लागि बाहीर जानुपर्ने भएकाले हामीलाई छिटो यो भारीबाट मुक्ति दिलाईदिनुस भनेर पटपकपटक अनुरोध गरेका थियौ तर सबै प्रयास लगाउँदा पनि कुनै उपाय लागेन । निराशा मात्र हात पर्यो । त्यसैले हामी छोरीको ज्यान जोखिममा नपरोस भनेर समस्यालाई थाँती राखी अहीले अमेरिका आउन वाध्य बन्यौं । यो वाध्यतालाई सबैले बुझिदिनुहुनेछ भन्ने आशा गर्छु ।
हामी भागेको होइन । छोरीको उपचार सम्पन्न भएपश्चात नेपाल फर्किनेमा कुनै सन्देह छैन । छोरीको उपचारपश्चात हामी नेपाल फर्किएर अब कलाकारितामै रम्न चाहन्छौं । तर, रंगशालाको उल्झनबाट मुक्ति नपाउँदासम्म हामीले नेपालमा न काम गरेर खान सक्ने, न चैनसित निदाउन सक्ने अवस्था रह्यो । हाम्रो यति चाहना छ, कि रंगशालाको समस्या समाधान भएर हामीले नेपालमै कलाकारिता गरेर बाँच्न सक्ने अवस्था बनोस ।
हामी अमेरीका आएको विषयलाई लिएर भ्रामक प्रचारवाजी र हल्लाको व्यापार पनि शुरु भइसकेछ । जुन कुरा हामी सार्वजनिक गर्ने नै थियौँ । अहीले हामी नितान्त छोरीको उपचारमा केन्द्रित थियाँै । छोरीको उपचारको प्रक्रिया पनि शुरु भएको छ, हामी निरन्तर अपडेट पनि गर्नेछौ । न त हामीले अमेरीकामा कुनै ब्यवसाय शूरु गरेको छौ न त कुनै लगानी नै छ । भ्रमको खेती गर्नेलाई धन्यवाद भन्नुवाहेक हामीसंग अरु कुनै शब्द छैन । अतः भ्रामक प्रचारवाजी र हल्लाको पछि नलागी दिनुहुन सबैलाई बिनम्र अनुरोध गर्दछौं ।
दुरिका हिसावमा टाढा भएपनि पनि हामी तपाईंहरुबीचमै छौं । सामाजिक सञ्जालले हामीलाई निरन्तर जोड्ने नै छ । अहिलेलाई हामी छोरीको सुरक्षित र सफल उपचारका लागि यहाँहरु सबैको आशीर्वाद चाहन्छौं ।
मुख्य कुरा हामीलाई रंगशालाको समस्याबाट मुक्ति दिएर कलाकारितामा फर्किने वातावरण राज्यले सिर्जना गरिदियोस्, नेपाल सरकारलाई हाम्रो विनम्र अनुरोध !
-1765430265.jpg)
-1764738164.jpg)
