‘शिरीषको फूल’ नाटकबाट रंगमञ्चमा डेब्यु गर्दै सनिशा

विविध

गृहपृष्ठ
विविध
‘शिरीषको फूल’ नाटकबाट रंगमञ्चमा डेब्यु गर्दै सनिशा

‘शिरीषको फूल’ नाटकबाट रंगमञ्चमा डेब्यु गर्दै सनिशा

बुधबार, असार २५, २०८२ रंगसंसार

अभिनेत्री सनिशा भट्टराईले रंगमञ्चमा डेब्यु गर्ने भएकी छन् । ‘१२ गाउँ’ जस्तो ब्लकबस्टर फिल्मबाट अभिनेत्रीको रुपमा डेब्यु गरेकी उनले नाटक ‘शिरीषको फूल’बाट रंगमञ्चको यात्रा सुरु गर्न लागेकी हुन् । कान्तिपुर फिल्म एकेडेमी अन्तर्गतको कान्तिपुर थिएटरले आगामी साउनमा मञ्चन गर्न लागेको उक्त नाटकमा सनिशाले ‘सकम्बरी’ पात्रको भूमिकामा अभिनय गर्ने जनाइएको छ ।

रंगमञ्चको यात्रा सुरु गर्न सनिशा उत्साहित देखिएकी छन् । उनले फेसबुकमा लेखेकी छन्, ‘भिडियो र फिल्मको कलाकारिता हुँदै ‘शिरीषको फूल’मार्फत रंगमञ्चको स्टेजमा नयाँ यात्राको अनुभव सुरु गर्न जाँदैछु । ‘शिरीषको फूल’को पात्र ‘सकम्बरी’ मेरो लागि विशेष हुनेछ ।’ उक्त पोस्टमा उनलाई अभिनेत्री स्वस्तिमा खड्का, संगीतकार अर्जुन पोखरेल लगायतले शुभकामना दिएका छन् ।

‘शिरीषको फूल’ नाटकमा सनिशाले कुनै समयका चर्चित अभिनेता जीवन लुईंटेलसँग मञ्च साझा गर्नेछिन् । यही नाटकबाट जीवन एक दशकपछि अभिनयमा फर्किन लागेका हुन् । यसमा उनले सुयोगवीर पात्रको भूमिका निर्वाह गर्नेछन् । हाल अमेरिकामा रहेका जीवन नाटक खेल्न आगामी साता नेपाल आउने जनाइएको छ । यतिबेला सनिशासहितको टिम नाटकको कार्यशालामा व्यस्त छ ।

पहिलो फिल्मबाटै लोभलाग्दो सफलता पाएकी सनिशाको दोस्रो फिल्म ‘नरसिंहा’ गत जेठमा प्रदर्शन भएको थियो । तर, यो फिल्म व्यावसायिक रुपमा सफल हुन सकेन । उनले खेलेका गीतका भिडियो भने प्रायः चर्चित छन् । ‘तिमीलाई हेर्ने बानी पर्‍यो’, ‘साइँली’, ‘ए होर माया’ जस्ता गीतले उनलाई दर्शकमाझ चिनाएको थियो । अब ‘शिरीषको फूल’बाट सनिशाले रंगमञ्चको अनुभव लिँदैछिन् ।

प्रकाशित मिति: बुधबार, असार २५, २०८२ ११:२१

प्रतिक्रिया दिनुहोस्