गाउँबेशी लोजिस्टिकका ब्राण्ड एम्बेसडर बने प्रमोद

विविध

गृहपृष्ठ
विविध
गाउँबेशी लोजिस्टिकका ब्राण्ड एम्बेसडर बने प्रमोद

गाउँबेशी लोजिस्टिकका ब्राण्ड एम्बेसडर बने प्रमोद

आइतबार, जेठ २४, २०८३ रंगसंसार

गायक प्रमोद खरेल कुरिअर सेवा प्रदायक कम्पनी गाउँबेशी लोजिस्टिकको ब्राण्ड एम्बेसडर नियुक्त भएका छन् । कम्पनीले शुक्रबार काठमाडौंस्थित एप्रिकस क्याफेमा आयोजित पत्रकार सम्मेलनमार्फत खरेललाई औपचारिक रूपमा ब्राण्ड एम्बेसडर घोषणा गरेको हो । सो अवसरमा कम्पनी र खरेलबीच सहकार्यसम्बन्धी समझदारीपत्र (एमओयू) मा हस्ताक्षर समेत गरिएको थियो ।

सम्झौतापत्रमा गाउँबेशी लोजिस्टिकका प्रमुख कार्यकारी अधिकृत (सीईओ) बिपिन रिजाल र गायक खरेलले हस्ताक्षर गरेका थिए । कार्यक्रममा बोल्दै सीईओ रिजालले प्रमोद खरेलको लोकप्रियता र कम्पनीको सेवाको पहुँचबीच समानता रहेको उल्लेख गरे । उनका अनुसार खरेलजस्तै गाउँबेशी लोजिस्टिक पनि देशका विभिन्न स्थानमा सेवाग्राहीसम्म पुग्न सफल भएकाले सहकार्यले सकारात्मक परिणाम दिने विश्वास गरिएको छ ।

कार्यक्रमकै अवसरमा प्रमोद खरेल आबद्ध परम्परा ब्याण्डको नयाँ गीत ‘सलल कर्णाली’ पनि सार्वजनिक गरिएको थियो । उक्त गीतको भिडियोमा गाउँबेशी लोजिस्टिकले सहयोगी संस्थाको भूमिका निर्वाह गरेको छ ।

गीतमा प्रमोद खरेलको मुख्य स्वर रहेको छ भने सृष्टि बुढाले सहगायन गरेकी छन् । गीतका शब्द तथा संगीत सुरज थापाले सिर्जना गरेका हुन् । संगीत संयोजन परम्परा ब्याण्ड र सुरज थापाको टोलीले मिलेर गरेका छन् भने गीतको सुरुआती शब्द भिम बिसीले लेखेका हुन् ।

‘सलल कर्णाली’को भिडियोमा प्रमोद खरेलसँगै मोडल अश्विनी शाहीको अभिनय देख्न सकिन्छ। कर्णाली क्षेत्रका मनमोहक दृश्य समेटिएको भिडियो अर्जुन तिवारीको टोलीले छायांकन गरेको हो । भिडियोको निर्देशन लक्ष्मण पौड्यालले गरेका छन् भने सम्पादन मिलन विश्वकर्माले गरेका हुन् । भिडियो निर्माणको जिम्मेवारी दिपा सिटौलाले सम्हालेकी छन् ।

कार्यक्रममा गायक खरेलले ‘सलल कर्णाली’लाई परम्परा ब्याण्डको विशेष तथा प्रतीक्षित प्रस्तुति भएको बताए । गीतको अडियो तथा भिडियो निर्माणमा टोलीले निकै मेहनत गरेको उल्लेख गर्दै अब यसको मूल्याङ्कन र प्रतिक्रिया दर्शक तथा श्रोतामाझ छाडिएको उनले बताए ।

प्रकाशित मिति: आइतबार, जेठ २४, २०८३ ११:२०

प्रतिक्रिया दिनुहोस्